លក្ខណៈពិសេស​ព្រះពុទ្ធសាសនា

Published: Friday, 19 June 2015 Written by Chan Virak Singha

ព្រះពុទ្ធសាសនាមានលក្ខណៈពិសេស ៣ យ៉ាងគឺ

១-វិធីសាស្ត្រៈ បានដល់ការសិក្សារៀនសូត្រពិធីផ្សេងៗក្នុងព្រះពុទ្ធសាសនា មានៈ ពិធីនមស្ការ ព្រះរតនត្រ័យ,ពិធីថ្វាយខ្លួនជាឧបាសក ឧបាសិកា, ពិធីបំបួសកុលបុត្រ, ពិធីប្រើប្រាស់បច្ច័យ៤, ពិធីធ្វើទានរក្សាសីល ចម្រើនមេត្តាភាវនា និងពិធីផ្សេងៗទៀត មានៈ មាឃ-វិសាខបូជា ជាដើម ។

២-និទស្សនៈ វិចារណកិច្ច ជាគ្រឿងបង្ហាញហេតុផលនៃសច្ចៈ មានបុគ្គលាធិដ្ឋានធម៌ និយាយប្រកាសពីផលបុណ្យ បាប នរក សួគ៌ ឱ្យឃើញច្បាស់នូវសកម្មភាពរបស់អ្នកធ្វើអំពើល្អ បានផលល្អ អ្នកធ្វើអំពើអាក្រក់ បានផលអាក្រក់ ដូចក្នុងទេវទូតសូត្រ និងក្នុងគម្ពីរធម្មបទ វិមានវត្ថុ បេតវត្ថុ ជាដើម ។

៣-ទស្សនវិជ្ជាៈ បានដល់បដិច្ចសមុប្បាទធម៌ និងអរិយសច្ចធម៌ជាដើម សម្រាប់ពុទ្ធសាសនិកសិក្សាពិសោធន៍ ឱ្យមានប្រាជ្ញាញាណជាបញ្ញវន្ត ដឹងស្គាល់នូវសភាវៈពិតរបស់លោកធាតុ ដើម្បីសាងជីវិតឱ្យបានសុខសន្តិភាព និងបរមសុខជាអមតៈ ។

ព្រះពុទ្ធសាសនា មានគុណយ៉ាងជ្រាលជ្រៅចំពោះប្រទេសកម្ពុជា

សូមនិយាយដោយសង្ខេបមាន ៣ យ៉ាងគឺ

១-ព្រះពុទ្ធសាសនា ជាមូលដ្ឋាន នៃការចាប់ផ្ដើមស្ថាប័នជាតិខ្មែរ តាំងពីមុនគ្រិស្តសករាជ៣០០ឆ្នាំ ដរាបបានកើតជាអារ្យជាតិវិសេសមួយក្នុងលោក ។

២-ព្រះពុទ្ធសាសនា ជាប្រភព នៃការរចនាភាសាខ្មែរ ឱ្យរីកដុះដាល កើតជាភាសាមួយក្នុងលោក ប្រកបដោយអង្គ ៣ ។ ដែលមាននិយាយក្នុងអត្ថបទអក្សរសាស្ត្រខ្មែរ សូមស្វែងរកអាន អង្គ ឬគន្លឹះរបស់ភាសាខ្មែរមាន ៣ យ៉ាង ។

៣-ព្រះពុទ្ធសាសនា ជាធានី ឬជាទីជម្រកធំ នៃអក្សរសាស្ត្រខ្មែរ ។ ដោយគុណបំណាច់នេះ ទើបអក្សរសាស្ត្រខ្មែរបានប្រកាសរំឭកគុណព្រះពុទ្ធសាសនានៅខាងដើមក្បួនរបស់ខ្លួនថា (នមោ ពុទ្ធាយ សទ្ធំ) វិសេសប្លែកជាងអក្សរសាស្ត្រនានាក្នុងលោក ។