កិរិយាសកម្ម និងកិរិយាអកម្ម

Published: Thursday, 12 February 2015 Written by: Chan Virak Singha

អ្នកបានដឹងហើយថា ល្បះនីមួយៗតែងតែមានកិរិយា។ កិរិយាខ្លះត្រូវការនាម រឺកន្សោមនាមនៅជាប់ខាងស្តាំវា ដើម្បីបញ្វប់ ន័យសេចក្តីរបស់ល្បះ។ ឯនាម​ រឺកន្សោមនាមនោះ ហៅថា កម្មបទរបស់កិរិយា។ កម្មបទរបស់កិរិយាជាកន្សោមនាម ដែលឆ្លើយនឹងសំនួរ ″អ្នកណា រឺ អ្វី″។ កិរិយាខ្លះទៀត មានន័យពេញលេញ ដោយមិនត្រូវកន្សោមនាម រឺសព្វនាមនៅបន្ទាប់ពីវា ទេ។

     ចូរអានល្បះខាងក្រោម៖

1. កុសល សួរនិមល។
2. និមល សើច។
3. មឺងសយ ត្បាញក្រមា។
4. សិប្បករ សំរាក។
5. កម្មករជញ្ជូនទឹកក្រូច។
6. ចាប ហើរ

     កិរិយា៖ សួរ  ត្បាញ  ជញ្ជូន  មានកម្មបទនៅខាងស្តាំវា។ ដើម្បីបញ្ចប់ន័យសេចក្តីរបស់ល្បះ។ កិរិយាទាំងនោះហៅថា កិរិយាសកម្ម។

     កិរិយាសកម្ម គឺជាកិរិយាដែលត្រូវការកម្មបទ (នាម រឺកន្សោមនាម រឺ សព្វនាម)នៅខាងស្តាំ ដើម្បីបំពេញន័យរបស់វា។

     កិរិយា៖ សើច  សំរាក  ហើរ  គ្មានកម្មបទ(នាម រឺកន្សោមនាម)នៅខាងស្តាំដើម្បីបំពេញន័យវាទេ។ កិរិយាទាំងនេះហៅថា កិរិយាអកម្ម។

     កិរិយាអកម្ម គឺជាកិរិយាដែលមិនត្រូវការកម្មបទ (នាម រឺកន្សោមនាម រឺ សព្វនាម)នៅខាងស្តាំ ដើម្បីបំពេញន័យរបស់វាទេ។